Ang Team Cebu City-Football nga kasagaran gibitoonan sa Don Bosco College (DBC) booters, mosugod na sa ilang kampanya sa 2nd Philippine Olympic Festival National Finals karong adlawa didto sa Philsports Complex sa Pasig City.
Ang mga Sugbuanon milatas sa finals round sa 15-under class human manghawod sa Visayas eliminations niadtong miaging bulan didto sa Iloilo City.
Naglangkob sa TCC’s line-up mao sila si Garwayne Abello, Angelico Ramirez, Charles Caballes, Mico Limalima, Peter Ricamora, Rikko de Guzman, Winrick Baclay, Leonard Tan, James Noel, Ropert Genlon ug James Nacorda sa DBC.
Mikuha sab si coach Glenn Ramos og laing pito ka players gikan sa nagkadaiyang tunghaan nga naglakip nilang Carl Arenas sa Sacred Heart School-Jesuit, Prince Anthony sa Abellana National School, Jules Villahermosa sa Centre of International Education, Emmanuel Cunningham sa Cebu International School ug Kenneth Young ug Joshua Cruz sa Springdale.