Donaire makikipagkita kay Shaw para makipag-ayos

Nakatakdang makipagkita si Filipino world flyweight champion Nonito “The Filipino Flash” Donaire, Jr. kay US promoter Gary Shaw sa susunod na linggo sa Maynila para ayusin ang anumang gusot sa kanyang unang title defense.

Makikipagpulong ang 24-anyos na International Boxing Federation (IBF) at International Boxing Organization (IBO) flyweight ruler kay Shaw kasama ang ama nitong si Nonito, Sr.

Inaasahang tatalakayin sa nasabing okasyon ang pagtatanggol ni Donaire sa kanyang IBF at IBO belt laban kay Mexican challenger Luis Maldonado sa Disyembre 1 sa Foxwoods Casino sa Mashantucket, Connecticut pati na ang kanilang promotional partnership.

Darating sa bansa si Shaw para dumalo sa World Boxing Council (WBC) Annual Convention na pormal na bubuksan bukas sa Manila Hotel.

Kasalukuyang nasa maigting na preparasyon si Donaire, may 18-1 win-loss ring record kasama ang 17 KOs, sa ALA Boxing Gym sa Cebu City kagaya ng ginagawa ng 29-anyos na si Maldonado, nagbabandera ng 37-1-1 (28 KOs), sa Mexico.

Darating ang grupo ni Maldonado sa United States sa Nobyembre 26, dalawang araw matapos bumiyahe ang tropa ni Donaire mula sa Pilipinas.

Isang linggong maghahanda si Donaire, nakuha ang IBF at IBO flyweight titles mula sa fifth round KO kay Armenian warrior Vic Darchinyan noong Hulyo 7 sa Bridgeport, Connecticut, sa San Leandro, California bago dumiretso sa Connecticut para harapin si Maldonado.

 “As far as we know, we are in tremendous shape for this fight. We’ve never had this kind of training in the past,” sabi ni Donaire. “I want to make a statement. Maldonado should be ready.” (Russel Cadayona)