Holcim Pryce moharong sa M. Lhuillier Kwarta Padala

Seguradong magkagidlay gyud ang Holcim Pryce Pharma-MisOr sa pagpadayon sa ilang tulo ka adlaw nga duwa sa Visayas Division dihang ilang sangkaon ang league leader M. Lhuillier Kwarta Padala-Cebu City karong gabii  sa pagpadayon sa 2007 Mindanao Visayas Basketball Association (MVBA) Second Conference diha sa Cebu Coliseum.

Ang  MisOr ni league chairman Gov. Oscar Moreno, nga mao karon ang nag-una sa standing sa Mindanao Division nga adunay balanseng 2-2 win-loss record, padayon pang nagduwa batok sa Arthro Kontra Arthritis (2-4) ni Jonathan 'Atan' Guardo kagabii atol sa pagsulat niini.

Sa laing bahin,  ang multi-titled Jewelers ni Michel Lhuillier ug coach Raul 'Yayoy' Alcoseba nagpanikad nga mokulit  sa  ilang lima ka sunod-sunod nga daog, apan  mag-agad kini sa ilang duwa karon gumikan kay wala ang ilang swingman nga si Jerry Cavan.

Si Cavan gisagpa og usa ka duwa nga suspensiyon  ug gipamulta og  P1,000 ni MVBA Visayas Commissioner Jose 'Boy' Murillo tungod sa iyang pagdapog  ni Harold Santa Cruz sa  Cebu Landmaster-Mandaue atol sa ilang engkuwentro niadtong Oktubre 16. Ang M. Lhuillier mipukan sa Cebu Landmaster ni Mandaue Mayor Jonas Cortes ug Joe Soberano sa iskor nga 86-67.

Gumikan niini, si coach Alcoseba mopahimulos og maayo sa serbisyo nilang Bruce Dacia, Marlon Basco ug Woodrow Enriquez.

Samtang ang MisOr magsandig sa abilidad nilang Lowell Briones, Anton Villoria ug Nathaniel Cruz, nga mao  kanunay ang makakuha og double digits.