Ang kanhi sinaligan sa national triathlon team nga si Abet Biagan mihatag og leksiyon ni RJ Balbuena sa off-road racing pinaagi sa pagdaog sa titulo Du it Off-Road Invitational Duathlon didto sa Barangay Pulangbato, ning siyudad.
Gitapos ni Biagan ang 5-20-3-kilometer, bike-run-bike race sud lamang sa usa ka oras ug 32 minutos uban ni Balbuena sa Plantation Bay-Team Kalit nga mitapos sa ikaduha sa oras nga 1:34.
Mikompleto sa top five mao sila si Rodolfo Verdida sa Kalit-Pepsi, Nogie Biagan ug si Walter Bandiga sa Team Bloodred.
Sa laing bahin, si Perlito Colegado mao usab ang midaog sa titulo sa novice pinaagi sa pagtapos sa karera sa oras nga 1:52.8.
Mipahiluna sa ikaduhang dapit mao si Kristian Mark Cabahug, gisundan ni Al Geyrozaga alang sa ikatulo ug Mark Fantonial, kinsa mitapos sa ikaupat nga dapit.
Naghari sab si Jun Endrina sa intra club category sa oras nga 1:48. Gisundan nilang Engr. Allan Loyao alang sa ikaduhang dapit, Mario Basnillo sa ikatulong dapit, Renie Pableo sa ikaupat nga dapit ug Dr. David Gonzales nga mikapyot sa ikalima nga dapit.
Si Grace Bascon sa Plantation Bay-Team Kalit mao usab ang nanghawod sa women’s division human niya gitapos ang lumba sud lang sa usa ka oras ug 56 minutos.
Ang mga mananaog sa duathlon event nakadawat og cash, medals, certificates ug assorted gift items gikan nilang Ryan Quinquino, Dr. David Gonzales, Dr. Rommel Bautista, Asahi Appliances, Benjoe Jimenez ug Joey Alban.