UV Green Lancers gibirahan sa Arthro
Wala makaugpo ang seven-time Cebu Schools Athletic Foundation, Inc. (CESAFI) champion University of the Visayas (UV) Green Lancers sa ilang pakigsangka sa Mindanao Visayas Basketball Association (MVBA) First Conference Visayas champion Arthro Kontra Arthritis dihang gilubong kini og 19 puntos sa ilang exhibition game didto sa Consolacion Sports Complex dili pa dugay.
Ang Arthro ni sports patron Jonathan ‘Atan’ Guardo ug coach Al Solis wala mohatag og higayon sa UV Green Lancers ni coach Elmer ‘Boy’ Cabahug nga makabuylo human milusad og sunod-sunod nga pagpangatake sa pagsugod sa duwa aron pag-abante og nuybe puntos, 16-7 paghuman sa first quarter.
Si Alex Cainglet miposa og 13 puntos, gisundan ni Ronaldo Bucao nga adunay 12 alang sa Arthro nga nakabentaha og 13 puntos, 41-28 sa first half.
Ang mga kanhi UV Lancers nga sila si Leodi Garcia, Jerome Gadiane ug Jonas Mark Ababon mitampo og 10 puntos matag usa alang sa Arthro, samtang sila si Doroteo Almacin, Jojo Omandam, Manny Garbas ug Bernie Ursal nagkumboya og 31 puntos.
Ang 6-foot-11 Fil-Am nga si Gregory Fuentes-Slaughter maoy nangulo sa UV Lancers nga miposte og game-high 20 puntos.
Puntos Matag
Arthro (83) - Cainglet 13, Bucao 12, Garcia 10, Gadiane 10, Ababon 10, Almacin 9, Omandam 9, Gabas 7, Ursal 6, France 4, Mapait 2
UV (64) - Slaughter 20, Berame 8, Tantongco 6, Dennison 6, Arda 5, Diputado 4, Luga 4, Manigque 4, Cincoflores 4, Lao 1
- Latest
- Trending
