Ilog sa no. 1 spot

Usa sa labing mahinungdanong tuyo sa  M. Lhuillier Kwarta  Padala ug  Cebu Landmaster-Mandaue sa ilang bugno karong adlawa diha sa Cebu Coliseum  mao ang paglabni sa numero unong  luna alang  sa semifinal round sa 2007 Mindanao Visayas Basketball Association (MVBA) Second Conference.

Seguradong eksplosibong duwa ang masaksihan  sa duha ka higanteng  mga koponan nga sugdan karong alas 5:30 sa hapon gumikan  kay ang Cebu Landmaster ni Mayor Jonas Cortes,  Joe Soberano  ug coach Jun Tan mihaw-as man gikan sa lima ka sunod-sunod nga kadaugan nga maoy naghatag kanila sa labing nindot nga 7-1 win-loss record ning  maong liga.

Dili sab kabintahaan ang M. Lhuillier ni Michel Lhuillier ug coach Raul 'Yayoy' Alcoseba gumikan kay lab-as pa man sab silang miposte og upat ka sunod-sunod nga kadaugan. Sa kinatibuk-an, ang Jewelers nagbitbit og   6-2 win-loss nga baraha.

Samtang  panalipdan sa Landmaster ang liderato, panimalos maoy tinguha sa M. Lhuillier nga gipukan sa Landmaster, 81-83, sa miaging nilang engkuwentro niadtong Septiyembre 21 didto  sa Mandaue City Cultural and Sports Complex.

Sandigan sa M. Lhuillier pagkab-ot sa maong tahas mao sila si Woodrow Enriquez (11.3 ppg), Bruce Dacia (14.6 ppg), Marlon Basco (10.9 ppg), ug Ron Capati (8.8 ppg).

Mopalig-on og  maayo sa Jewelers mao si Leo Bat-og ingon man ang presensiya nilang Stephen Padilla, Lou Gatumbato, Danny Aying, Alano Caputolan  ug Gerry Cavan.

Sa habig sa Landmaster, naglaum kini   nilang  Mark Yee (13.6 ppg), Mike Manigo (12.0 ppg), Bong Marata (11.3 ppg) ug Richard Ian Saladaga (10.4 ppg) uban sa suporta nilang  Chris Nicdao, Harold Sta. Cruz, Jimwell Torion  ug Aries Gloria.