Wala mobati'g kaikog ang Cebu Jaycees ngadto sa ilang mga bisitang koponan gikan sa San Pablo City-Lipa ug sa Cagayan de Oro City Jaycees dihang ila kining gipilde sa ilang exhibition games niadtong Biyernes didto sa City Sports Club-Cebu sa Cebu Business Park.
Gilatos sa Caltex-powered Versacool ang Cagayan de Oro Jaycees sa iskor nga 69-46, samtang giayo sab og lubong sa Lite Shipping ang Lipa City Jaycees sa iskor 60-38.
Ang maong duwa usa ka tinuig nga kalihukan sa Cebu Jaycees diin sila makigtakus batok sa kauban nila sa Jaycees gikan sa nagkalain-laing dapit sa kapupud-an.
Wala gyuy dag-anan ang duha ka mga bisitang koponan kay pulos kini kulang og hangin ug dili kini makaambas sa duwa sa Cebu Jaycees.
Hinay miirog ang iskor sa Versacool kay dili kaayo manulod ang ilang mga tirada nga nakahatag og higayon sa CDO Jaycees pagsikit sa duwa. Dihang nakuha na sa Cebu Jaycees ang momentum sa duwa, wala na kini molingi pa hangtod na sa pagkutlo og daog.
Si Chito Hernandez maoy nangu sa Versacool nga mikati og 19 puntos, gisundan ni Jimbo Noel nga adunay 12 puntos ug si Jeremy Huang, anak sa kanhi presidente sa Cebu Basketball League (CBL) nga si Jack Huang miamot og 11 puntos.
Nangulo sa CDO Jaycees mao si Junji Siao sa iyang 18 puntos lakip na niini ang gipabutong upat ka triples, samtang si Jonh Noble miiskor og nuybe puntos nga pulos gikan sa three point area.
Sa unang duwa, sagunson nga baskets ang gipabuhagay ni Dr. Boy Te aron paghipos og 12 puntos sa Lite Shipping apan si Edmund Odulio maoy topscorer sa maong duwa nga mipupo og 16 puntos, gisundan ni Chris Sta. Maria nga mikulit og 14 puntos.
Si Alfie Racelis mao ra ang bugtong nakakuha'g double figures sa Lipa City sa iyang 10 puntos.
Puntos matag usa
First Game
Lite Shipping (60) – Odulio 16, Sta. Maria 14, Te 12, Seno 7, Jayme 5, Yu 4, Pono 2
SP/Lipa City (38) – Racelis 10, Olmos 8, Dimaculangan 6, Aquino 5, Garcia 4, Barbaza 2, Dioso 2, Dela Cruz 1
Second Game
Versacool (69) – Hernandez 19, Noel 12, Huang 11, Chua 6, Sy 6, Cruz 5, Tolentino 4, Mercado 4, Lin 2
CDO Jaycees (46) – Siao 18, Nobel 9, . Along 8, Dahramdas 5, Ubay-ubay 4, Dael 2