Kompletong line up sa CESAFI All-Stars

Nakompleto na  ang paghagpat  sa 15 ka dekalibreng magduduwa nga  maoy  maglangkob  sa Cebu Schools Athletic Foundation, Inc. (CESAFI) All-Stars sa ilang sangka batok sa  Sugbuanong  si Dondon Hontiveros ug ang iyang San Miguel Beermen sa usa ka charity basketball match karong Septiyembre 2 diha sa Cebu Coliseum.

Si CESAFI commissioner Felix O. Tiukinhoy, Jr. mibutyag kagahapon nga ang lineup sa CESAFI All-Stars gilangkuban og unom ka  magduduwa sa University of the Visayas (UV) Green Lancers nga sila si Gregory Fuentes-Slaughter, 6-foot-8  Rino Berame, Von Harry Lanete, Chris Diputado, Michael Luga ug Ariel Mepaña.

Moduwa sila uban nilang Enrico Llanto ug Niño Ramirez sa University of San Carlos (USC), Lyndon Gudez ug John Malinao sa University of San Jose-Recoletos (USJ-R) ug Alain Abellanosa sa University of Cebu (UC).

Mikompleto  sa  kampo sa CESAFI mao sila si Jayford Aldabe sa Don Bosco, Enrique Zanoria sa Southwestern University (SWU), Moncrief Rogado sa University of Southern Philippines-Foundation (USP-F) ug Sherwin Abobo sa Cebu Institute of Technology (CIT).

Motimon sa CESAFI All-Stars mao si  Elmer  'Boy'  Cabahug sa UV Lancers  uban ni Alfonso 'Al' Solis, isip iyang assistant.

Ang kumbati tali sa CESAFI ug San Miguel kabahin sa "Triple Threat Charity Game" nga gipasiugdahan ni Hontiveros.

Ang mga tiket mapalit karong Huwebes sa Mail and More Ayala ug SM outlets. Ang tiket nagkantidad og P30 alang sa general admission, P75 sa upper box, P175 sa lower box ug P250 sa ringside.

Alang sa dugang detalye, mahimong motawag sa (032) 254-1000.