Tulo ka titulo gilumpong sa Carolinians

Gilumpong  sa University of San Carlos (USC) ang tulo ka championship titles sa bag-o lang natapos nga 3rd San Roque Football Fiesta Cup   didto sa San Roque fields sa barangay Subangdaku, dakbayan sa Mandaue.

Ang  Carolinians maoy midominar sa men’s ug women’s open ug  boys 19 categories  sa  20 ka  teams  nga  misalmot. Gipilde sa USC ang Persian Gulf Eagles nga gilangkuban sa Iranian players, 1-0 aron pag-angkon sa titulo nga kanhi gihuptan sa Don Bosco Alumni FC, kinsa wala mosalmot karong tuiga.

Sa women's open, nagpabilin gihapon nga hari ang  defending champion USC human gipakauwawan ang  host-San Roque Football Club, 3-0.

Ang duha ka goals nga gihansak ni Apple Bariñan alang sa kadaugan sa USC, igo na kaayo alang kaniya nga ilhong  most valuable player.

Wala sab magpapiri ang Carolinians sa boys 19 division dihang midaog kini sa kulbahinam nga duwa batok  sa  Team Cebu City (TCC) pinaagi sa  penalty shoot-out, 2-1.

Naangkon sa Don Bosco College (DBC) ang titulo sa 36 and above human nila gipilde ang Sambag 1 FC pinaagi sa penalty kick-out, 2-0.

Dobleng selebrasyon ang naangkon sa DBC  dihang si Waldemar Sanchez maoy napiling  MVP.