Mandaue mopanday lig-ong team sa GUV Cup

Ang dakbayan sa Mandaue mopahigayon og duha ka adlaw nga try-out alang sa mga potential volleyball players sa tinguha nga makaporma og usa ka lig-ong koponan alang sa ikatulong edisyon sa Governor Gwen Garcia Unity Volleyball (GUV) Cup nga moulbo sunod bulan .

Si project coordinator Glen Bercede ug M. Lhuillier Sports Development Foundation (MLSDF) executive director Eddie B. Ybañez mipahibawo atol sa usa ka panagtigum sa miaging gabii sa White Gold House Restaurant nga ang try-out ipahigayon ugmang adlawa gikan sa alas 9:00 sa buntag hangtod sa alas 12:00 sa udto diha sa  Mandaue City Cultural and Sports Complex.

“I have been instructed by Mayor Jonas Cortes to form a strong team for this GUV Cup event that is why we’re holding this tryouts. I hope our volleyball players will come and join because the pride of Mandauehanons is at stake here,” matud pa ni Bercede.

Bisan ang GUV Cup nagtanyag og dakung ganting salapi alang sa cluster winners ug grand champion, dili malilong nga ang tuyo sa mga magduduwa nga modaog mao ang paghatag og dungog sa siyudad o lungsod diin sila mirepresentar.

Sa miaging tuig, ang Talisay City belles  maoy nakampiyon pinaagi sa pagpukan sa Lapu-Lapu sa upat ka sets, 20-25, 25-17, 25-19, 25-15 ug ingon man pagbulsa sa P200,000 nga ganting salapi.

Alang sa dugang detalye kabahin sa try-out,  mahimong motawag o text nilang coach Eddie sa 0926-7319004 ug Bercede sa 0917-3218858.Si Bercede makig-   tambayayong ni Ybañez, kinsa  usa sab ka multi-titled basketball coach, gumikan kay ang MLSDF pinaagi sa way puas nga suporta ni Michel J. Lhuillier, mibubo man sa hugtanon niining suporta ngadto sa mga proyekto ug programa alang sa kalamboan sa paugnat sa kusog sa Mandaue.