DEDON sportsfest 2007 buksan karong Domingo

Andam na ang tanan alang sa pagpahigayon sa tinuig nga Dedon Manufacturing, Inc. Sportsfest  2007 nga mosikad karong Domingo  didto sa Dedon Plant 3 sa Riverside, Canduman, dakbayan sa Mandaue.

Pito ka teams ang  mobanat ug mopakita sa ilang tinagoang abilidad ning usa ka semana nga kompetisyon. Kini mao ang Blue, Black, Yellow Green, Gold, Pink, Grey ug Lavender.

Sama sa naandan, adunay parada  nga pagahimuon nga salmotan sa mga  partisipanteng  koponan ug  adto kini  manukad sa Dedon Plant  1 sa barangay Pagsabungan paingon ngadto sa Dedon Plant  3 sa Riverside, Canduman.

Ang  parada sugdan sa alas-7:30 sa buntag.

Mga duwa nga tigian mao ang basketball, volleyball (mixed), badminton (dual), chess (singles), dart (dual/mixed) ug table tennis.

Si Lilane Malagusan, ang over-all chairman nagkanayon nga ang nag-unang tulo ka teams sa matag events makadawat og ganting salapi ug tropeyo. Apan wala gibutyag ni Malagusan kun pila ang ganti nga madawat   sa mga mananaog.

Ang awarding ceremonies gitakda karong Agosto 18 didto sa DEDON Manufacturing Inc.  Plant 3.

Ang maong sportsfest  kabahin  sa kasaulogan sa ikapito nga anibersaryo sa DEDON Manufacturing Inc.