ABF-CSMA quarterly badminton tournament banatan ugma

Andam na ang tanan alang sa  Architects Badminton Federation (ABF)-Cebu Sports Media Association (CSMA) Quarterly Badminton Tournament ugma adto sa Racquet Zone Badminton Club of Montebello Villa Hotel sa Brgy. Apas, ning syudad.

Ang maong torneyo gibahin sa tulo ka kategoriya, ang level E-1 , E- 2 ug E- F.

Ang mga magduduwa sa CSMA katagon sa tulo ka level. Ang panagparis unya sa CSMA mahibaw-an pinaagi sa “drawing of lots”.

Ang  organizers sa maong event pinanguluhan ni Alan Choachuy, ang nakadawat karong tuiga sa “Presidential Award” nga gikan sa Sportswriters Association of Cebu (SAC), naglaum nga ang matag level moabot og 12 ka team.

Ang matag level bahinon sa duha ka grupo.

Ang maong torneyo dunay single-round robin format ug ang top two team sa kada grupo maoy moabanti sa crossover semifinals. Ug ang mogawas nga mananaog maoy maghinampakay sa finals.

Gisuportahan sa DURABEND, ang extra ordinary board, ang usa ka adlaw nga kumbati giabagan sab sa Avia, Moldex, Republic Powercoat of Cebu, Filmon Hardware, Cebu Home Builders, Edcon Glass ug Aluminum ug Racquet Zone.