264 mga bata nakapahimos sa libreng basketball clinic

Miabot ngadto sa 264 ka mga bata ang nakapahimulos sa free basketball clinic nga gipangulohan ni University of the Visayas (UV) Baby Lancers coach Delfin 'Pafom' Pepito, Jr. niadtong Biyernes atol sa opening salvo didto barangay Tayud, Pulpogan ug Jugan sa Consolacion, Cebu.

Ang barangay Tayud maoy pinakadaghang misalmot nga miabot sa 157 ka mga estudyante ug dayon ang gisundan sa Pulpogan nga adunay 59 ug ang Jugan nga adunay 48 ka mga estudyante.

Matud pa ni Pepito nga iyang balikon ang tulo ka barangays aron matiwas ang iyang gitudlo nga basic fundamentals.

Si Pepito mobalik og pahigayon og free clinic liwas sa Semana Santa, diin laing upat ka barangays nausab ang iyang pagabisitahon nga mao ang barangay Garing, Pulog, Cabangahan ug Poblacion sa Consolacion.

Buot unta ni Pepito nga makapahimulos ang tanang barangay sa maong free basketball clinic, apan ang ubang barangays walay igo luna sama sa gyms o kaha mga korte .