MLDVL men, women tournament gitakda

Sama sa naglagiting nga kainit sa summer mao sab ang idalit nga aksiyon sa M. Lhuillier Developmental Volleyball League (MLDVL) men and women’s open tournament nga mosikad karong Abril 28 diha sa University of San Carlos (USC)-main gym.

Si Eddie B. Ybañez, ang executive director sa M. Lhuillier Sports Development Foundation (MLSDF), nagkanayon nga ang tuyo ug tumong sa maong torneyo mao ang pagbaid sa abilidad sa mga athleta sa Cebu Schools Athletic Foundation, Inc. sa ingon maandam sila alang sa regular CESAFI season nga ipahigayon sa naghinapos nga bahin ning tuiga.

Sa pagka karon, aduna nay pito pa ka teams sa men’s ug women’s divisions ang nipadayag sa ilang partisipasyon sa maong usa ka bulan nga kompetisyon.

Mga koponan nga nikompirmar sa women's division mao ang University of San Jose-Recoletos (USJ-R), University of San Carlos (USC), University of Southern Philippines- Foundation (USP-F), University of Cebu (UC), Southwesten University (SWU), Hiroshi ug ang MLSDF selection, samtang mobanat sa men’s class mao ang University of the Visayas (UV), USJ-R, UC, USC, USP-F ug Cebu Institute of Technology (CIT).

Gawas sa mga school-based teams, ang mga organizers modawat sab og commercial entries.

Alang sa dugang detalye, mahimong motawag ni coach Eddie sa (032) 345-7892 ug (032) 255-4423 o dili ba sa 0926-7319004.