Montiel mihulga di mo-away ni Gorres

Si World Boxing Organization (WBO) super flyweight champion Fernando Montiel mihulga nga dili siya motunga sa gikatakda niyang pagdepensa batok sa Sugbuanong challenger nga Z Gorres karong Pebrero 24 nga maoy main event sa "Moment of Truth" boxing promotion diha sa Cebu City Sports Center.

Matud pa ni Montiel nga dili siya "uto-uto" ug moaway lamang siya karong Marso 4 - ang orihinal nga petsa nga maoy nalatid sa kontrata - ug dili karong Pebrero 24.

"I am not going to fight on February 24 in the Philippines as announced by Eric Gomez on Tuesday. I signed a contract to defend the title on March 4 and I am not going to reverse gear... I do not know what they want me to do, but that is my position," matud pa ni Montiel ngadto ni David Kaufman sa boxnoticias.com.

Sa dihang gipangayoan sa iyang reaksiyon, si international promoter Sammy Gello-ani nagkanayon nga walay angay nga ikabalaka kay mahinayon ang promosyon bisan og dili pa moanhi si Montiel.

Gipadayag ni Gello-ani nga walay laing kapaingnan si Montiel kondili ang pag-away ni Gorres karong Pebrero 24 kay kun magdumili kini, hayan mahuboan siya sa iyang korona ug si Gorres moaway batok sa No. 2 contender nga si Pramuansak Phosawan sa Thailand alang sa bakanteng WBO title.

Si Gello-ani mipasabot nga ang kumbati nilang Montiel ug Gorres giuswag sa sayo nga petsa aron pagtuman sa 90 ka adlaw nga grace period nga nalatid sa regulasyon sa WBO purse bidding aron ipahigayon ang maong away. Ang bidding nahitabo niadtong Nobiyembre 27, 2006 ug mapupos kini karong Pebrero 25, 2007.

Matud pa ni Gello-ani nga una nilang gitakda ang away karong Marso 4 kay mao man unta kini ang main event sa World Cup of Boxing. Apan kay gisibog man ang World Cup ngadto sa bulan sa Hulyo, wala siya'y mahimo kondili pagtakda og petsa sa away sigun sa probisyon nga gihatag sa WBO.

Sa laing bahin, si WBO president Paco Valcarcel mihatag og 48 oras ni Montiel pagtubag sa iyang pagdumili og pirma sa kontrata kalabot sa iyang pagdepensa batok ni Gorres.