Roach dili mo-train ni Pacquiao

Malagmit dili maka-train si Freddie Roach ngadto ni Manny 'Pacman' Pacquiao sa gikatakda niining away batok sa Korean champion nga si Injin Chi karong Abril 28 didto sa Wynn Hotel-Casino sa Macau.

Kini human gikubit ni Roach ang tanyag nga mamahimong chief trainer ni Oscar de la Hoya sa umaabot niining superfight batok ni "pound-for-pound" king Floyd Mayweather Jr. karong Mayo 5 didto sa Las Vegas.

Matud pa ni Top Rank chairman Bob Arum nga sa kadug-ol sa petsa, imposibleng ma-train ni Roach ang duha ka banggiitang boksidor. Nunot niini, si Arum nasagmuyo sa desisyon ni Roach ug nagplano siya nga iya kining palagputon isip trainer ni Pacman.

Gihulagway ni Arum si Roach nga walay baruganan gumikan kay wala kini motuman sa iyang gisaad atol sa iyang pag-anhi sa Pilipinas. Gisaad ni Roach nga si Pacquiao lamang ang iyang bansay-bansayon ug wala siya'y plano nga mo-train ni de la Hoya.

Sukwahi sa mga pamahayag ni Arum, si Roach nagkanayon nga gisuportahan siya ni Pacquiao sa iyang desisyon kay nasayod kini nga usa ka dakung oportunidad ang mamahimong trainer ni de la Hoya sa labing daku ug mahinungdanong away niini sa iyang career.

Gipadayag ni Roach nga andam siyang tagana sa iyang assistant nga si Justin Fortune aron maoy modala sa iyang papel isip trainer ni Pacquiao.

Malipayon kaayo si Roach sa taas nga pagsalig ug kompiyansa ni de la Hoya kaniya ug mipasalig kini nga buhaton niya ang tanan kutob sa iyang mahimo aron sila magmadaugon.