Domingo pabiling kampiyon

Nagmalampuson si Michael Domingo sa SGG Stable sa iyang pagpanalipod sa iyang korona human sa iyang kadaugan batok sa challenger niining si Edgar Gabejan sa Baguio City pinaagi sa unanimous decision niadtong miaging gabii sa main event sa "Pound for Pound" diha sa Talisay City Sports Complex.

Duha ka mga hurado nga sila si Salven Lagumbay ug Edward Ligas pulos mi-iskor og 115-113 pabor ni Domingo, samtang si Johnny Davis mihatag og 114-114 kon tabla.

Mao kini ang ikaupat nga higayon nga nadepensahan ni Domingo ang iyang korona human kini niya mailog gikan sa mga kamot ni kanhi kampiyon Joel Bauya sa Emil Romano Stable pinaagi sa 9th round technical decision niadtong Hulyo 30 sa miaging tuig didto sa San Andres Sports and Civic Center sa Manila.

Sa undercards, gipalukapa ni Bert Batawang sa SGG Stable si Rey Orais sud lamang sa unang hugna sa oras nga 1:14.

Samtang si undefeated welterweight prospect Mark Jason Melligen sa ALA Boxing Gym mipaundang sab ni kanhi RP champion Rex Marzan sa oras nga 1:36 sa second round alang sa iyang ikalimang sunod-sunod nga kadaugan human kini mahimong professional.

Lain usab nga ALA Boy nga si Rocky Fuentes mipakamang sab sa beteranong si Rolly Mandahinog sa Mindanao sa 43 segundos sa ikaduhang hugna aron pag-angkon og kahigayonan pag-ilog sa bakanteng WBO Asia-Pacific flyweight crown.

Ang garbo sa Talisay nga si Rashied Bacus nagmalampuson sab sa iyang away human kini midaog pinaagi sa unanimous decision batok ni Jerry Manganip sa Butuan City.

Sa laing kumbati si Reman Salim sa SGG Stable midaog pinaagi sa technical decision sud sa 36 segundos sa ikaunom nga hugna batok ni Rico Genon, si Rogen Flores mipaundang ni Roel Honor sa oras nga 2:45 sa unang hugna ug si Marjo Borres nidaog batok ni Ranie Pamatian pinaagi sa unanimous decision.