Kun asa ka komportable

Ang matag magdudula adunay iyang kaugalingong estilo sa pagdula. Kini ang hinungdan nga dili ang tanang mga sugyot ug tips sa pagdula og bilyar applicable ngadto sa usa ka magdudula. Ang tanang tips mapuslanon ug epektibo, apan dili makapahimulos niining tanan ang usa ka magdudula tungod kay aduna man ing uban niini nga dili mohaom sa iyang estilo.

Si Samm Diep, usa sa mga respetadong kolumnista sa billiard website nga Azbilliards.com, miingon nga dili kinahanglan nga sagupon sa usa ka magdudula ang tanang mga sugyot ug tips nga iyang makuha gikan sa iyang instructor o ba kaha sa mga libro nga iyang nabasa. Dili man gud niya magamit ang tanan. Ang maayong buhaton sa magdudula mao nga tun-an kun hain ang mga sugyot ug tips nga mohaom sa iyang estilo sa pagdula.

* * *

Matud pa ni Diep, kun asang dapita nga komportable ang magdudula, anha siya manukad sa iyang pagbansay. Sa dapit usab nga komportable ang magdudula, anha siya magpabilin ug ang tanang sugyot ug tips nga iyang sagupon kinahanglang mohaom sa sukaranan sa epektibo niyang pagdula. Dili maayo alang sa usa ka magdudula ang paggakos sa bisan unsang tips. Kinahanglang magpabilin siya sa kaugalingon niyang estilo aron mas lig-on ug mas epektibo ang iyang performance.

Gipasabot ni Diep nga lisud kaayo ang pagdula sa estilo nga wala kaandi sa usa ka magdudula. Mao nga kinahanglan gayod nga magpabilin ang magdudula sa naandan niyang estilo aron pagseguro nga komportable siya sa iyang pagdula. Kun aduna man ing mga taktika nga angay sagupon, kinahanglang sutaon nga dili kini mobikil sa naandan nga estilo sa magdudula.

* * *

Kining maong panahom ni Diep gidasonan usab sa lain pang mga kolumnista sa Azbilliards nga sila si Glenn Bond ug Kim Shaw. Midugang sila sa pag-ingon nga ang pagdula pinasubay sa kaugalingong estilo mas epektibo kay sa pagsagop sa estilo sa uban. Ang estilo gud sa pagdula mao man mismo ang magdudula. Busa kun ang magdudula nakaila sa iyang kaugalingon, mas epektibo ang iyang pagdula.

Adunay lohika nga atong makuha gikan niini. Nagpasabot kini nga kinahanglang masayod ang magdudula sa iyang kalig-on ug kahuyang. Pinaagi niini, iyang masuta kun unsa ang angay kaniya. Segurado usab nga komportable siya sa iyang pagdula kun siya nakaila sa iyang kaugalingon. Mao nga ang unang lakang nga angay himuon sa magdudula mao ang pagsuheto sa kaugalingon niyang estilo.

Ikaw, Bords, unsa man ang imong estilo sa pagdula? Komportable ka ba niini? Ilha ang imong kaugalingon. Kinahanglang masayod ka kun diin dapita nga ikaw lig-on ug kun diing dapita nga ikaw huyang sa imong performance.

* * *

(Mga sugyot ug pakisayod? Text sa 0910-8105522)