Nietes moharong ni Amol

Si Donnie 'Ahas' Nietes sa ALA Stable moaway sa labing unang higayon alang sa mas dakung dungog gumikan kay iyang harungon si Heri Amol sa Indonesia sa 12 ka hugna nga kumbati alang sa bakanteng World Boxing Organization (WBO) Asia Pacific minimumweight title karong Nobiyembre 24 diha sa Mandaue City Cultural and Sports Complex.

Ang maong eksplosibong card, nga koberan sa Solar Sports isip kabahin sa "Stars of the Future" boxing series niini, pormal nga gilusad ni international promoter Sammy Gello-ani atol sa usa ka news conference kagahapon sa SUGBAHAN Food Corner sa may dalan A.S. Fortuna dakbayan sa Mandaue.

"Everything is already final. Donnie Nietes will fight against Indonesian Heri Amol for the vacant WBO Asia Pacific minimumweight title on November 24 in Mandaue," matud ni Gello-ani.

Si Nietes nagtangag og 18-1-3 (10KOs), samtang si Amol adunay 14-3-2 (4KOs).

Masaligon si Nietes nga modaog siya batok ni Amol bisan og wala pa kini makakita sa estilo sa inawayan niini.

"Kompiyansa kaayo ko nga ako siyang mapilde. Akong paningkamotan nga ako siyang ma-knockout," matud pa ni Nietes.

Bisan og siya maoy inilog, dili hinuon angayan nga mokompiyansa si Nietes gumikan kay si Amol nakaagi man og kakampiyon sa 105 lbs. human pakamanga si Bayu Anggoro sa ika-12 nga hugna sa ilang engkuwentro niadtong Nobiyembre 18, 2004 didto sa Jakarta.

Sa undercards sa maong kulbahinam nga binakbakay nga gipasiugdahan sa SGG Sports Promotion, duha ka batan-ong pambato sa ALA Stable nga sila si Milan 'CDO Bonito' Milendo (7-0, 2KOs) ug Along 'Boholano Bulldog' Denoy (11-6, 5KOs) moladlad sab sa ilang abilidad.

Si Milendo, nga mipalukapa ni Ricardo Albia sa ikatulong hugna niadtong Oktubre 21 diha sa Mandaue, makigharong ni Rommel Bongon sa Tisajo Stable sa Manila, samtang si Denoy makigtakos ni Aljun Salogaol sa Jaca stable sa Sugbo.

Adunay nakahan-ay nga special attraction diin ang labing bag-ong pro sa ALA stable nga si Joseph Omanz makigbinakbakay ni Rey Las Piñas sa Butuan City.

Magsangka sa preliminary bouts mao sila si Leon Maratas vs. Lotlot Gaviola, Jessie Albaracin vs. Edmund Velayo, Nic Banal vs. Brix 'Bomb' Ray, Weng Haya vs. Alfredo Balabat, ug Franklin Albia vs. Romano Gelig.