Osmeña-Cebu nakatilaw na gyud og daog sa NBC National Cup

Ang Osmeña-Cebu kusganon kaayong mipabanak sa ilang opensa sa katapusang kuwarter aron pag-angkon sa 75-74 nga kadaugan batok sa North Cotabato Braves sa 2006 Spring Cooking Oil-NBC National Cup didto sa Provincial Capitol gym Amas, Kidapawan City.

Si ex-pro Marlon Legaspi maoy mipabangon sa Osmeña-Cebu human sa iyang undergoal shot sa nahabiling 11 segundos.

Mao pa kini ang unang daog sa koponan ni kanhi senador John Osmeña sa tulo nila ka duwa ning maong liga nga gipaluyohan usab sa Sulpicio Lines, Spring Cooking Oil, Molten, Nature's Spring Mineral Water, Holiday Plaza Hotel-Cebu ug Prime Channel.

Si Nino Marquez nipupo og 22 puntos aron pagluwas sa Osmeña-Cebu, samtang si kanhi MLQU standout Legaspi nitampo og 16 puntos uban ang 13 ka rebounds ug duha ka blocks.

Samtang si Henry Fernandez, kinsa niposte og 28 puntos lakip na ang tulo ka tres mao usab ang nangulo sa pilderong Braves.

Nakawang lang ang kanunay'ng paglabaw sa Braves lakip na niini ang kinadak-ang labaw nga ilang natala sa iskor nga 53-39 kay gipatay sa Osmeña ang ilang duwa sa katapusang kuwarter.

Ang Braves ni Gov. Manny Pinol nagbitbit karon og 3-3 win-loss records.