Cebuana Lhuillier Pera Padala mopahigayo'g try out alang sa PBL

Gipahibalo ni Cebuana Lhuillier-Pera Padala head coach Luigi Trillo kagahapon nga mopahigayon siya og try-out alang sa iyang PBL team karong Domingo gikan sa alas 6:00 hangtud sa alas 9:00 sa gabii diha sa Cebu Coliseum.

Matud pa ni Trillo, usa sa mga assistant ni Alaska coach Tim Cone sa Philippine Basketball Association (PBA), nga ang try-out abli lamang ngadto sa mga players nga nag-edad og 26-anyos ug paubos.

"I'm inviting those who are interested to be part of our PBL team to join the try-out. It's really been my desire to hire the services of Cebuano players because we're carrying a Cebu team. Besides, I also know for the fact that Cebu is full of basketball talents," pasabot ni Trillo.

Ang Cebuana Lhuillier maoy usa sa duha ka guest teams nga mopakita'g aksiyon sa PBL Silver Cup nga sugdan karong Nobiyembre 11. Ang lain mao ang Mail and More.

Kini maoy labing unang higayon nga mobalik ang Cebuana Lhuillier sa PBL human sa 20 ka mga tuig nga pagpadaplin.

Si team owner Jean Henri Lhuillier nagpanikad na sa ilang kampanya batok sa maayong amateur teams sa Manila.