5th ML Kwarta Padala Cup banatan Sept. 24

Ang University of San Carlos (USC) Warriors ug University of San Jose-Recoletos (USJ-R) Jaguars makigharong batok sa managlahing kaatbang pagsugod sa 5th M. Lhuillier Kwarta Padala Cup Under-21 basketball tournament karong Septiyembre 24 diha sa Cebu Coliseum.

Ang USC Baby Warriors makigtakos batok sa Consolacion National High School (CNHS) Black Shama sa pasiunang duwa, samtang ang USJ-R Baby Jaguars makigsangka batok sa Hoop It Up alang sa ikaduhang duwa.

Sa lain pang mga aksiyon, ang Salazar College of Science and Institute of Technology (SCSIT) Baby Skyblazers moharong batok sa Consolacion LGU Sarok ug ang MLSDF-Mantawi Dream Team makighamag batok sa Athletes for Christ in Excellent Service (ACES).

Ang iskedyul sa mga duwa gipaagi sa ripa atol sa meeting nga gipatawag ni league organizer ug MLSDF executive director Eddie Ybañez sa miaging gabii diha sa White Gold House Restaurant.

Ang maong torneyo magsubay og single robin format diin ang top four teams moabante sa crossover semifinals.

Ang no. 1 ug no. 2 makaangkon og twice-to-beat incentives batok sa no. 3 ug no. 4.

Ang moguwang mananaog maoy mag-abot sa knockout championship.

Sa laing bahin, si tournament commissioner Eddie Montalban mipahibawo nga ang katapusang adlaw pagduso sa mga credentials sa mga atleta hangtod lamang sa Septiyembre 15.