Brazilian kontra ni Bautista

Si ALA boxing star Rey 'Boom Boom' Bautista makigharong og bag-ong kontra nga si Brazilian super bantamweight champion Giovanni 'Bombardeio' Andrade sa umaabot niyang away didto sa Amerika sa undercard sa rematch nilang Marco Antonio Barrera ug Rocky Juarez karong Septiyembre 16 didto sa MGM Grand Hotel and Casino sa Las Vegas, Nevada.

Ang garbo sa Bohol nga wala pay pidle sa 20 ka away diin 16 sa mga biktima niini iyang gipayaka orihinal nga makigsangka ni Chilean "Matador" Moises Guiterrez, apan dili kini makaaway human gibasura ang ilang aplikasyon nga makakuha og US visa.

Beterano sa 60 ka away, si Andrade nagtangag og 51-9 win-loss record uban ang 41KOs.

Iyang gikabangga ang pipila ka mga dekalibreng boksidor sama nilang kanhi WBO super flyweight champion Johnny Tapia, WBA Fedelatin champion Martin Honorio ug interim WBA super bantamweight champion Celestino Caballero.

Si Sampson Lewkowicz, ang matchmaker sa Golden Boy Promotions nagkanayon nga ilang gipili ang beteranong Brazilian gumikan kay seguradong mahatagan og maayong away si Bautista.

"We have big plans for Boom-Boom," matud pa ni Lewkowicz pinaagi ni international promoter Sammy Gello-ani. "But we are not rushing things."

"Boom-Boom can learn much from Andrade because of his experience," dugang pang Lewkowicz. "This will be a good testing ground for him (Boom-Boom) before he fights for a world title."

Bisan og bag-o pa niyang gihubo ang iyang korona isip WBO Asia Pacific sa bantamweight champion aron mokampanya sa super bantamweight, si Bautista nakaaway na duha ka higayon ubos sa timbang nga 122 ka libras kun jr featherweight division nga pulos didto awaya sa Amerika.

Ang una niadtong bisperas sa pasko sa miaging tuig diin siya nakabangon human matumba sa ikaduhang hugna dayon na ngadto sa pagpukan ni Gerardo Espinoza pinaagi sa unanimous decision didto sa Sycuan Resort and Casino sa California.

Ikaduha miresulta ngadto sa pagpakamang niya ni Nicaraguan Roberto Bonilla sa ikatulong hugna didto sa Staples Center sa Los Angeles.

Si Bautista mogikan sa Amerika karong Agosto 10 uban sa iyang trainer nga si Edito 'ALA' Villamor aron mangandam sa iyang away batok ni Andrade.