Domingo batok Lear

Human sa iyang kadaugan batok sa Meksikanong si Alejandro Felix Montiel, si Philippine bantamweight champion Michael Domingo sa SGG Stable mopakita na usab sa iyang abilidad diin modepensa kini sa iyang korona batok ni Johnny Lear karong gabii didto sa Metropolis Mall sa Ayala Alabang.

Kahinumduman, si Domingo mipakamang ni Montiel sa unang hugna sa wala pa paundanga ang Meksikano sa ikapitong hugna sa undercard sa kumbati nilang Manny Pacquiao ug Oscar Larios niadtong Hulyo 2 didto sa Araneta Coliseum. Si Domingo manalipod sa ikatulong higayon sa titulo nga iyang nasakmit human gipukan ang kanhi kampiyon nga si Joel Bauya pinaagi sa kontrobersiyal nga split decision niadtong Hulyo 20 sa miaging tuig didto sa San Andres Sports and Civic Center sa kaulohan.

Si Domingo, nagtangag og baraha nga 25-13-3 (11KOs) ug wala na kini makatilaw og pilde sa walo ka away sukad siya gisagop ni international promoter Sammy 'Don King' Gello-ani duha na ka tuig ang milabay.

Katapusang nidepensa sa iyang bakus batok ni Roger Galicia pinaagi sa pagpakamang sa ikasiyam nga hugna niadtong Pebrero 3 didto sa Larga Pedrista, Quezon City.

Si Galicia maoy boksidor nga mipukan ni Lear pinaagi sa technical decision sa ikalimang hugna aron pag-angkon sa WBC International bantamweight title niadtong Marso 15, 2003 didto sa Luneta Park sa Intramuros, Manila.

Dili hinuon masayon-sayon ni Domingo si Lear gumikan kay ang naulahi miharos man og daog sa katapusan niyang lima ka away.