Johnson linghod pa batok Riley?

Duha ka bantugang coaches nag-abot sa NBA finals nga sila si Pat Riley sa Miami Heat ug Avery Johnson sa Dallas Mavericks ang mi-demanda og disiplina ug ang ilang panagribal lisud tugkaron.

Apan ang sayon nga komparison mao ang paglantaw sa experience (si Riley usa sa mga winningest coaches sa NBA history ug si Johnson mao pay iyang unang season pag-coach sa Dallas).

Si Riley nabantog sa iyang three-hour practices, samtang si Johnson naila sab nga league's video king.

Kahinumduman, ang 41-anyos nga si Johnson maoy nakadawat sa coach of the year award niini nga season dihang iyang giwitkan ang Dallas og best seasons sa franchise history.

Naila nga "Little General" sa iyang oncourt leadership ug diminutive stature, si Johnson maoy ikawalo nga coach sa 26 ka tuig nga kasaysayan sa Mavericks human si Don Nelson miretiro niadtong Marso 2005.

Sa dihang usa pa siya ka basketbolista, iyang gitunolan ang Antonio Spurs sa labing unang NBA championship niadtong 1999 pinaagi sa paglansang og 18-footer winning shot.

Nagsugod ang maayong panghitabo pagsugod sa iyang coaching career. Nakahipos siya og 66 ka daog sa 82 ka duwa ug maoy fastest coach sa kasaysayan sa liga nga nakaabot og 50 career wins.

Sa iyang bahin, si Riley sukad sa iyang pagtapon sa Miami niadtong 1995, ang Heat nakapuga og 455-333 (.577) record.

Ang beteranong si Riley mihatod sa Los Angeles Lakers og upat ka NBA titles niadtong 1980s ug final appearance sa 1994 uban sa New York Knicks.

Si Riley maoy mihulip ni Stan Van Gundy isip coach sa Miami sa sayong bahin niini nga season.