Lhuillier naka-una

Ang Visayas Division champion M. Lhuillier Kwarta Padala-Cebu Jewelers maoy unang nakabentaha human nila gipilde ang karibal nga PacMan-GenSan, 101-91 sa Game-1 sa ilang best-of-five ML Kwarta Padala Mindanao Visayas Basketball Association (MVBA) First Conference Finals niadtong Martes diha sa Cebu Coliseum.

Ang PacMan ni boxing champion Manny Pacquiao ug coach Ramon Pido maoy unang nanginit ug pinaagi sa kombinasyon nilang Jaypee Locsin ug Mindanao Division MVP Louie Medalla, ang bisitang koponan mipakugang sa M. Lhuillier human sila makalabaw og 16 puntos, 43-27 sa nahabilin nga 7:28 sa ikaduhang kuwarter.

Apan igo lang diay gipatubo ang iskor sa GenSan gumikan kay ang Jewelers pinaagi sa gipakitang kadasig ni Niño Ramirez, nakakitkit sa iskor, 47-53 human sa first half.

Misalida sab silang Woodrow Enriquez ug Visayas Division MVP Jayford Rodriguez aron pagpalabaw sa M. Lhuillier, 65-64 sa nahabiling kuwatro minutos sa ikatulong kuwarter nga maoy nahimo nilang taytayan ngadto sa kadaugan.

Mikiat sab si Michael Manigo diin mibuhi og duha ka 3-pointers sa gipabutong 10-2 sa M. Lhuillier nga maoy nakahatag sa Jewelers ni coach Raul "Yayoy" Alcoseba sa kinadak-an nilang labaw nga 12 puntos, 82-70.

Sa katapusang higayon, mipakita og mabangis nga labok ang PacMan aron pagpaduol niini sa iskor nga 83-86, apan sila si Manigo ug Enriquez mitali og 10 puntos matag usa sa katapusang kuwarter aron pagselyado sa kadaugan sa M. Lhuillier ning torneyo nga gipaluyohan sa ML Kwarta Padala, Cokaliong Shipping Lines, Nature's Spring Drinking Water, Gameface.ph, Molten, Panasonic ug Sulpicio Lines.

Si Manigo maoy nangu sa Jewelers sa iyang 23 puntos, samtang sila si Enriquez ug Rodriguez mikulit og 18 puntos matag usa. Si Ramirez midonar og 14 puntos.

Nangulo sa pilderong PacMan mao si Weng Farochillen nga adunay 18 puntos, gisundan ni Locsin nga miamot og 17, 11 niini iyang gibubo sa unang kuwarter. Sila si Medalla ug Noel Sandoval nagkumboya og 26 puntos apan nakawang lamang ang ilang paningkamot.