Kickboxing sa Liloan Mayo 20

Ang Tigers Hall of Martial Arts inabagan sa PNP Liloan, Cebu ug sa Barangay Intelligence Network mopahigayon na sab og full-contact kickboxing nga ulohan og "1st Mayor Sevilla Eskrima Sukmag Patid (ESP) Kickboxing Showdown of Champions 2006" karong Mayo 20, 2006 sa alas 7:30 sa gabii diha sa Panphil Frasco Sports Complex, Liloan, Cebu.

Pagasalmotan kini sa mga banggiitang eskrimadors ug kickboxers sa Central Visayas ubos sa promotion ni Master Dann Diaz sa Tigers Hall of Martial Arts Self Defense Gym.

Magsangka sa top main events nga gitakda sa lima ka hugna mao si Junrey Sukite sa Lapu-Lapu City batok ni Bonifacio Jañola sa Negros Team, Brandon Pepito sa VESPAF Cebu batok ni Adonis Espera sa Mandaue City ug Jingjing Diaz sa Consolacion, Cebu batok ni Army Candilasa sa Negros Team, ug lain pang siyam ka preliminary bouts.

Katuyoan sa maong torneyo mao ang paglikay sa mga kabatan-onan sa pagamit sa ginadiling drogas.

Ang maong torneyo gipaluyohan usab ni Police Inspector Milo Ercillo Dagasdas, hepe sa maong lungsod.

Ang mao usab nga kalihukan usa sa mga kalingawan sa umaabot nga kapistahan ni Sr. San Fernando Rey sa nahisgutang dapit.