P29M gi-andam alang sa winners

Mokabat ngadto sa P29,000 ang i-apud-apud nga ganti sa mga mananaog sa 1st Mayor Antonio L. Canoy Inter-City/Municipality Chess Team Tournament nga gikatakda karong Mayo 13-14 didto sa San Fernando Sports Complex sa San Fernando, Cebu.

Ang makampiyon sa maong torneyo modawat og P10,000, samtang ang mopahiluna sa ikaduhang dapit mobitbit og P5,000. Ang motapos sa ikatulo ug ikaupat nga puwesto mobulsa og P5,000 ug P3,000.

Gawas niini, ang mga top board players makaangkon og P1,000 matag usa.

Ang maong torneyo abli sa tanang teams nga morepresentar og usa ka siyudad o dili ba munisipalidad.

Matag team langkuban og upat ka regular members ug duha ka alternate players. Usa lamang ka titled player ang tugotan nga makaduwa sa usa ka team.

Ang format nga gamiton mao ang single round robin o dili ba Swiss system depende sa gidaghanon sa mga entrante.

Ang registration fee nagkantidad og P900 matag team.

Mopadagan sa duha ka adlaw nga torneyo mao si tournament director Bob S. Tojong inabagan ni chief arbiter Marvin Ruelan.

Alang sa dugang mga detalye, mahimong motawag ni Ruelan (412-1076 ug 0916-4232335), Roger Nalos (0910-3943131) o dili ba ni Rey Pangahin (0918-3625414).