Resto Bar nakalingkawas sa ABG Associates

Ang Pipeline Resto Bar nidaog sa ABG Associates sa iskor nga 93-90, sa kulbahinam kaayong duwa sa miaging adlaw sa Jumawan's Cup-Cebu Institute of Technology Basketball Association tournament diha sa Vicente Sotto Memorial Gym.

Bisan wala makatunga ang uban nilang sinaligan, ang ABG nakapakita gihapon sa ilang abilidad gani nagtabla kini paghuman sa unang tunga, 44-44.

Apan ang puwersa sa Resto Bar mao gyuy nipatigbabaw sa nanghinapos nga bahin sa duwa ubos ni Reeve Jumawan kinsa mihipos og 23 puntos aron paghatod sa maong kalamposan.

Daku sab kaayo og natampo silang Pete Patrimonio ug Joel Castro sa maong kadaugan diin nagkombuya sila og 38 puntos.

Sa maong kadaugan, ang Resto Bar nakigsawo karon sa ilang biktimang ABG bitbit ang 5-3 win-loss record.

Si Darwin Consuegra mihipos og 29 puntos alang sa pilderong ABG

Sa laing duwa, wala pa gihapon makatilaw og daog ang Corrtech human gilubong og 20 puntos sa Frontel, 72-52.

Ang kombinasyon nilang Roger Perales, Esmie Herbito ug Dondon Yap nga nagkumboya og 46 puntos maoy responsable sa kadaugan sa Frontel, samtang ang kanhi Crispa stalwart Freddie Serafica, kinsa nipupo og 18 puntos mao usab ang nangulo sa pilderong Corrtech.