Depensa sa WPC title sisimulan ni Pagulayan

Opisyal nang idedepensa ni defending champion Alex Pagulayan ng Philippines ang kanyang titulo ngayon sa pagtitipun-tipon ng may 128 greatest players sa mundo sa Kaohsiung Business Exhibition Center saTaiwan upang lumahok sa 2005 Kaohsiung World Pool Championship.

Haharapin ni Pagulayan ang mahigpit na kompetis-yon mula sa mga manlalarong kumakatawan sa 28 iba’t ibang bansa. Nakataya sa limang araw na torneong inorganisa ng Match Room ay ang halagang US $350,000 (P19.6 Million) na ang kampeon ay may garantiyang iuuwi ang top prize na US $75,000 (P4.2 Million).

Siyam pang ibang Pinoy sa pamumuno ni 1999 champion Efren ‘Bata’ Reyes ang umusad sa main draw. Makakasama ni Reyes sina dating world number 1 Francisco ‘Django’ Bustamante, 2005 San Miguel Asian 9-Ball Manila leg winner Ronnie Alcano, Singapore leg winner Gandy Valle, Rodolfo Luat, Marlon Manalo, Dennis Orcullo, Warren Kiamco at Antonio Lining.

Bukod sa Pinoy ang mga paborito sa torneo ay sina two-time World Pool champion Chao Fong Pang at 2005 San Miguel Asian 9-Ball Tour overall champion Yang Ching Shun ng Chinese Taipei, Thorsten Hohmann at 2002 World Pool champion Earl Strickland ng United States. Ito ay mapapanood sa ESPN at Star Sports.