The Freeman/Aksiyon Radyo team napukan sa Sunstar

Giinat sa ABS-CBN Kapamilya ug sa Sun.Star Daily ang ilang baraha human nila gipalukapa ang ilang tagsa-tagsa ka kaatbang aron sa pagpabiling walay pildi sa nagpadayong aksiyon sa Gov. Gwen Garcia Cup 2005 Newsmen Basketball Association dinhi sa Sugbu kagahapon didto sa Cebu City Sports Club.

Ang ABS-CBN Kapamilya sayon ra kaayong milatos sa wala pay daog nga CCTN-47/Bantay Radyo, 54-43 samtang ang Sun.Star Daily mipukan sa The Freeman/Aksiyon Radyo, 69-45.

Ang ABS-CBN kasamtangan karong nangulo sa liderato bitbit ang 3-0 win-loss record nga gisundan sa Sunstar ug GMA-7 Kapuso sa 2-0 win-loss.

Sa kasamtangan, ang Sunstar nakahimo gilayon ug impresibong labok diin ilang gibiyaan ang The Freeman/Aksiyon Radyo pinaagi sa 12-0 sa sayong bahin sa unang kwarter ngadto na sa pagpaburot sa 26 puntos nga labaw.

Apan ang The Freeman/Aksiyon team mibawos usab ug pagpatuasik sa ilang mga puntos hinungdan nga mihiyos ang maong labaw ngadto na lang sa 13 puntos, 40-53 sa hinapos nga bahin sa ikatulong kwarter kortesiya ni Manny Villaruel kinsa mihipos og 26 puntos aron sa pagpangulo sa The Freeman/Aksiyon Radyo team.

Samtang sa main game, nakuha gyud sa Cebu Daily News/RPN-9 ang unang daog human nila gibombahan ang Bombo Radyo/ABC-21 Bombers, 53-38.

Puntos matag-usa:

Sun.Star (69) - Lonzon 19, Violeta 11, Michelena 9, Rosillo 8, Costelo 8, Defensor 4, Campana 4, Taneo 2, Badayos 2, Lirazan 2

The Freeman (45) - Villaruel 26, Melecio 5, Piloton 4, Davis 2, Padigos 2, Ligan 2, Bustamante 2, Languido 2.