Shell at bagong import diniskaril ng Purefoods

Nakabangon ang Purefoods sa limang sunod na kabiguan nang kanilang igupo ang Shell, 95-82 sa pagpapatuloy ng Gran Matador PBA Fiesta Conference na dumako sa Balanga, Bataan kagabi.

Diniskaril ng Purefoods ang debut game ng bagong import ng Turbo Chargers na si Melvin Robinson matapos itala ang kanilang ikalimang panalo sa 11 laro na katabla na ngayon ng Sta. Lucia at ng kanilang biktimang Shell na lumasap ng kanilang ikatlong sunod na talo.

Pinangunahan ni Noy Castillo na kumamada ng 18-puntos ang Pure-foods.

Halos 30 minutong naantala ang laro dahil sa pagsabog ng isang circuit breakers sa kaagahan ng ikatlong quarter, abante ang Purefoods, 53-43.

Sisikapin ng Alaska na hatakin sa anim na sunod na panalo ang kanilang winning streak sa pakikipagharap sa dumadausdos na Barangay Ginebra na magpaparada ng bagong import sa pagpapatuloy ng aksiyon sa Ynares Center.

Tampok na laro ang laban ng Gin Kings at Aces sa alas-7:35 ng gabi pagkatapos ng sagupaan ng FedEx at ng Red Bull sa alas-4:45 ng hapon.