Uichico,puntang US para mag-aral

Bilang paghahanda sa pagbubukas ng regular season ng Philippne Basketball Association, nagtungo si San Miguel Beer coach Jong Uichico sa United States upang mag-aral ng mga bagong techniques sa pagko-coach.

Dismayado ang Beermen sa kanilang naging kapalaran sa nakaraang Gran Matador Fiesta Conference nang masibak sa quarterfinals ang San Miguel matapos dominahin ang elimination round.

Umalis noong Biyernes ng gabi si Uichico patungong U.S. kung saan makikibahagi ito sa mga coaching seminars at bibisita sa mga practice ng iba’t ibang teams sa National Basketball Association (NBA) sa loob ng dalawang linggo.

"This is probably one of the ways to make up for what happened (in the PBA Fiesta Conference). We have to start work for the next season early," wika ni Uichico.

Sasamantalahin na rin ni Uichico ang pagkakataong maghanap ng kanilang magiging import para sa reinforced conference.

Isa sa makakasalamuha ni Uichico sa immersion program ay ang dating coach ng Phoenix Suns na si Paul Westphal.

"It’s going to be more like an informal meeting. Just among people who want to talk about basketball. Hopefully, I could learn a lot about his philosophy in basketball," ani Uichico.

Bibisita ang San Miguel mentor sa team practice ng Los Angeles La-kers, na mamanduhan na ngayon ng dating Houston coach na si Rudy Tomjanovich kapalit ni Phil Jackson, Memphis Grizzlies at iba pang NBA teams.

Tinanggal na ng PBA Board ang height limit para sa mga imports sa lahat ng conference kaya umaasa si Uichico na makakita ng malaking import.

"We no longer have that old reliable that we can call on when we need an import. I guess it’s time to look for a fresh face," paliwanag ni Uichico. "Before, we’d just ring up Art or Lamont (Strothers). Now, we don’t have those guys anymore. And obviously, with the height limit waived, we have to really look for a new and bigger talent." (Ulat ni CVOchoa)