Tangkay ibinangon ang Welcoat

Nagpasiklab ang dating PBA player na si Hercules Tangkay nang kanyang ibangon ang Welcoat House Paints tungo sa 90-84 panalo kontra sa Blu Star Detergent sa pagsisimula ng kanilang kampanya sa semifinals ng PBL Platinum Cup sa Pasig Sports Center.

Nagposte si Tangkay, naglaro sa Sta. Lucia Realty sa PBA, ng career-high na 40 puntos, 37 nito ay sa ikalawang bahagi ng labanan mula sa paghahabol nila sa 25 point deficit sa first half.

Naramdaman din ng Welcoat ang pagkawala ni Marc Pingris na sinuspinde ng isang laro dahil sa pagduduro sa isang game official sa kanilang laban kontra sa Montana.

Ngunit hindi ito naging hadlang para sa Paint Masters nang bumawi si Tangkay sa kanyang tatlong puntos na produksiyon sa ikalawang quarter sa pamamagitan ng eksplosibong performance sa second half.

Mula sa 43-31 kalamangan ng Detergent Kings, humataw si Tangkay ng 20 puntos sa ikatlong quarter upang makalapit ang Paint Masters, 68-61.