Welcoat kakapit sa liderato

Pipilitin ng defending champion Welcoat Paints na higit pang mapasolido ang kanilang pangunguyapit sa solong liderato sa pakikipagtagpo nila ngayon ng Montaña Pawnshop sa pagpapatuloy ng PBL Platinum Cup sa Pasig Sports Center.

Taglay ang 4-1 win loss slate, babanggain ng Paint Masters ang Jewelers na nag-iingat naman ng 3-1 kartada sa ala-1:45 ng hapon  

Kung mabibigo ang Paint Masters sa labang ito, sila ay babagsak sa ikalawang puwesto at ang pangunguna ay maaagaw ng Montaña papasok sa ikalawang round elimination ng torneong ito.

Nakasakay sa kanilang impresibong 88-73 tagumpay kontra sa ICTSI noong Sabado, ibig ng Paint Masters na isara ang kanilang kampanya sa first round elimination na nasa mataas na reputasyon, kaya’t inaasahang gagawa ito ng agresibong opensa upang idiskaril ang ambisyon ng Jewelers.

Samantala, puntirya naman ng Viva Mineral Water na mapigilan ang kanilang paglubog sa nakatakdang duwelo nila ng Blu Star Deter-gent sa alas-3:45 ng hapon. (Ulat ni M. Repizo)