Lhuillier nakalusot sa quarterfinals

Pinabagsak ng Cebu’s M. Lhuillier cagers ang Homer Mercado, 83-80 noong Miyerkules ng gabi upang makasungkit ng quarterfinal slot sa 4th Danny Espiritu Cup Invitational Open basketball tournament sa Lyceum gym.

Abante ang Cebuanos sa 63-56 makaraan ang tatlong quarters, nagawa nilang pigilan ang tangkang rally ng Homer Mercado upang iposte ang kanilang ikaapat na panalo sa pitong laro at makasama ng defending champion Spring Cooking Oil (5-2), Homer (4-3) at Forward Taguig sa quarterfinals.

Awtomatikong nakopo ng nangungunang Hartman Seigle (6-1) at ML Kuarta Padala (5-2) ang kani-kanilang semifinals slot at twice-to-beat advantage kontra sa kani-kanilang makakalaban.

Makakaharap ng Spring ang Taguig, habang haharapin ng Lhuillier ang Homer Mercado kagabi upang mabatid kung sino sa dalawang koponan ang awtomatikong papasok rin sa semis sa tourney na ito na hatid ng Spring Margarine, Morning Star Tours & Travel at Red Bull.

Ang mananalo sa labanan ng Spring at Taguig, sa sagupaan sa pagitan ng Lhuillier-HM games ang siyang haharap naman sa Kuarta Padala at Hartman Seigle, ayon sa pagkakasunod sa semis.