Pinoy archers hahasain sa 7 international tournaments

Pitong international tournaments ang nakatakdang salihan ng mga Filipino archers na patungong Busan Asian Games sa darating na Setyembre ngayong taon.

Dahil sa kanyang naging performance sa nakaraang Southeast Asian Games sa Kuala Lumpur, Malaysia, nakakasiguro na si Purita Joy Marino na mabibigyan ng training na handog ng Olympic Solidarity Program ng Philippine Olympic Committee.

Ang iba pang international events na nasa kalendaryo ng National Archery Association of the Philippines para sa taong ito ay ang mga sumusunod:

25th Malaysian championship sa Sintok Kedah, Malaysia sa Mayo 24-27, Asian Grand Prix (Chongzhou, China, Hunyo 19-28); Grand Prix Tournament of Nations (Erlanger, Germany, Mayo 27-Hunyo 2); 4th world university Championship (Chonburi, Thailand, Hulyo 9-15), Busan Test Match (Busan, Korea, Hulyo/Agosto) at Masters Games (Melbourne, Australia, Oct. 5-10).

Gayunman, sinabi ni NAAP president Ramon Lim na ang partisipasyon ng mga archers ay depende sa ibibigay na pondo ng ahensiya.

Magsasagawa rin ang NAAP ng mga local tournaments gaya ng national target championship (individual at team) sa Abril-30-Mayo-5 sa PSC archery range sa Diliman, QC at national championship (recurved at compound division) sa Nov. 27-Dec. 1 sa Ninoy Aquino Stadium.