Charity basketball game ni Hizon sinuportahan ng mga cagers at celebrity

Nagsidalo ang mga professional at celebrity basketball players upang magbigay ng suporta sa kauna-unahang ‘Vince Hizon Foundation Charity Basketball Game’ na ginanap noong nakaraang Sabado sa PhilSports Arena sa Pasig City.

Umabot sa 14 na manlalaro ang lumaro para sa magandang layunin na ito na kinabibilangan nina MBA’s Cebu Gems, Joey Sta. Maria, ‘The Basketball Show’ host at Phil. Star sports columnist, Bill Velasco, Funny man Willie Revillame, MBA’s San Juan Knights, Christian Calaguio, PBA’s Talk N Text, Bong Ravena, MBA’s Dominic Uy at PBA’s Sta. Lucia consultant at team playing coach Alfrancis Chua para sa And1Hoopsters uniform.

Ang And1 Ballers ay binubuo naman nina MBA’s San Juan Knights Omanzie Rodriguez, ABS-CBN’s ‘MTB’ host John Estrada, dating PBA Purefoods player Ullyses Tanigue, sports-minded presidential son Datu Arroyo, PBA legend Samboy Lim, host Vince ‘The Prince’ Hizon at PBA’s Sta. Lucia head-coach Norman Black na nagsilbing playing coach ng Ballers.

Nanguna si Hizon sa And1 Ballers sa kanyang kinanang 29 puntos na tinampukan ng 7 tres, habang si Uy naman ang siyang bumandera sa And1 Hoopsters sa kanyang tinapos na 18 puntos.