La Salle-Iligan vs West Negros maglalaban para sa Coke Go-For-Goal under-16 title

BACOLOD City -- Naisaayos ng La Salle Academy ng Iligan at West Negros College ang showdown para sa titulo ng 17th Coke Go-for-Goal under-16 national football crown sa Paglaum Sports Complex dito.

Ginulantang ng La Salle-Iligan ang St. Paul School ng Barotac Nuevo, 2-1 habang naungusan naman ng West Negros ang NCR titlist De La Salle Zobel, 1-0.

Umiskor sina Altahil Faisal at Mark Toribio sa ika-37th at ika-55th minuto ayon sa pagkakasunod upang iselyo ang ikatlong sunod na panalo ng LSA sa torneong ito na sponsored ng Coca-Cola at Adidas bilang official ball.

Umiskor naman ang WNC skipper na si Billy Rey Batayola ng direct free kick mula sa taas ng penalty box sa ika-50th minuto upang bigyan ng isa pang pagkakataon ang host team na makatuntong sa national finals.

Ang kaisa-isang goal ng St. Paul ay nagmula kay Kinley Delgado na umiskor sa ika-69th minuto ng labanan.

Ang team individual awards ay igagawad ng pangulo ng Philippine Football Federation na si Rene Adad pagkatapos ng final match ng series na hosted ng Negros Occidental Football Association sa pangunguna ni Rep. Charlie Cojuanco.