Lacson: Nambabastos sa impeachment court, mako-contempt

MANILA, Philippines — Maaaring maharap sa contempt at mapatawan ng parusa ang sinumang saksi na magpapakita ng kawalang-galang sa Senado bilang Impeachment Court, ayon kay Senator-Judge Panfilo “Ping” Lacson.

Ang babala ay ginawa ni Lacson matapos niyang punahin ang naging asal ni Davao City Assessor Engr. Jaime Adalin, unang­ saksi ng depensa, na aniya’y ngumingisi, tumatawa at halos gawing­ katatawanan ang pagdinig noong Lunes.

Ayon kay Lacson, mali­naw sa Rule V ng Senate Rules on Impeachment Trials na may kapangyarihan ang Impeachment Court na magparusa sa sinumang susuway o magpapakita ng paghamak sa awtoridad nito.

Binigyang-diin din niya na hindi lamang implied kundi tahasang ipinagkaloob sa impeachment court ang kapangyarihang mag-contempt.

Sinuportahan din ni Lacson ang panawagan ni Senator-Judge Vicente Sotto III na paalalahanan ang lahat ng testigo tungkol sa mga parusa laban sa pagsisinungaling sa korte.

Kinumpirma naman ni Presiding Officer Francis Escudero na maaaring i-cite for contempt ang mga saksing walang paggalang sa hukuman at maharap din sa kasong perjury.