Mga estudyante sa Quezon pinagsusuot ng face mask

LUCENA CITY, Philippines — Pinayuhan ang mga estudyante at buong komunidad ng Enverga University sa lalawigan ng Quezon na magsuot ng face mask kapag nasa labas dahil sa iniulat na haze na nakaaapekto sa CALABARZON Region at ilang bahagi ng bansa.

Batay sa community advisory ng isa sa mala­king pribadong unibersidad sa lungsod, iniulat ng Department of Environment and Natural Resources–Environmental Management Bureau (DENR-EMB) ang pagkakaroon ng haze sa ilang lugar sa Pilipinas. 

Maaaring may kaugnayan umano ito sa usok at transboundary haze mula sa patuloy na mga sunog sa Kalimantan, Indonesia.

Kaugnay nito, hinika­yat ang mga estud­yante ng Enverga University na magsagawa ng ka­ragdagang pag-iingat, partikular kapag nakikitang makapal ang haze sa kanilang lugar.

Pinapayuhan din ang lahat na limitahan ang matagal na pananatili o pagsasagawa ng mga aktibidad sa labas, habang dapat namang maging mas maingat ang mga indibiduwal na may mga kondisyon sa respiratory o cardiovascular system.