Sekyu ‘di binigyan ng advance, manager at driver pinagbabaril

MASBATE CITY, Masbate, Philippines - Sugatan ang national administrator manager ng isang security agency at nadamay rin ang driver nito matapos na pagbabarilin ng kanilang gwardya na nagalit makaraang hindi siya pagbigyan sa hinihinging “advance” sa sahod sa loob mismo ng kanilang tanggapan sa Omnibuz Security Agency Office sa Purok-3, Brgy. Asid, Masbate City, Masbate kamakalawa ng umaga.

Kapwa sugatang isinugod sa Diocesan Hospital ang mga biktima na kinilalang si Lyn, 49-anyos, dalaga, residente ng naturang lugar at ang driver nito na si Jim, 24-anyos. Sumuko naman sa mga barangay officials makaraan ang pamamaril ang suspek na kinilalang si Drei, 26-anyos, residente ng Brgy. Biyong. Isinuko rin nito ang Kalibre 38 baril na ginamit sa pamamaril.

Sa ulat, dakong alas-8:30 ng umaga nagpunta ng kanilang opisina ang suspek at humihirit ng “advance” kay Lyn. Pero ayon sa manager ay 500 lang ang pera nito at tutungo pa lamang sa bayan para mag-withdraw.

Dahil wala pang maipahihiram na pera ay nag-offer muna ang biktima ng bigas sa gwardya at pinakukuha lang ito sa kanilang opisina. Gayunman, marahil ay minasama ito ng suspek kaya binunot nito ang kanyang service firearm at saka pinagbabaril ang kanyang manager pati ang driver nito.