Engkwentro sa Cordova, usa patay
CEBU, Philippines — Patay ang usa ka giingong armadong lalaki human makig-engkwentro sa kapolisan sa Sitio Tomoy, Barangay Ibabao, Cordova, Cebu, pasado alas 11 sa gabii niadtong Miyerkules, Agosto 5.
Ang namatay giila lamang sa alyas “Balot,” 31, residente sa Sitio Bankal, Barangay Ibabao, Cordova.
Base sa report sa Cordova Municipal Police Station, nakadawat sila og sumbong gikan sa usa ka concerned citizen bahin sa presensya sa usa ka armadong lalaki sa maong lugar.
Sumala sa nagtaho, ang lalaki nagsul-ob og itom nga sando ug hugaw nga puti nga shorts. Pag-abot sa mga polis, dalidaling nisulod ang suspek sa usa ka abandonadong balay ug gikan didto gikatahong gipabuthan niini ang mga polis.
Tungod ani, nibawos og pabuto ang mga polis hinungdan sa iyang kamatayon. Nakuha gikan sa crime scene ang usa ka revolver nga wala pa matino ang kalibre nga dunay upat ka bala, usa ka paketeng gidudahang shabu.
Gidala dayon si alyas “Balot” ngadto sa Mactan Doctors’ Hospital sa dakbayan sa Lapu-Lapu, apan gideklarar siyang dead on arrival sa doktor.
Sa dugang imbestigasyon sa kapolisan, nasayran nga si alyas “Balot” mao usab ang giingong responsable sa pagpusil patay kang alyas “Jojo,” 28 anyos, residente sa Barangay Buaya, Lapu-Lapu City, sa Sitio Bankal, Barangay Ibabao, Cordova, niadtong Hulyo 12, 2026, mga alas 11:50 sa buntag.
Matud pa sa kapolisan, napasakaan na og kasong murder si alyas “Balot” sa Provincial Prosecutor’s Office kalabot sa maong insidente. IBM BANAT NEWS
- Latest
