Kalapasan ba?

Ako wa gyud mosuhid sa uban nga migamit sa Artificial Intelligence (AI) aron mahimoan sila og hulagway nga nagsul-ob na og uniporme sa polis, apan ambot og unsay kaso nga magamit aron ikiha sila.

Dunay mga opisyal sa kapolisan miingon nga makiha ang maong mga tawo, apan dunay fiskal nga miingon nga sa paggamit lang sa picture sa AI, nga magpakita nga nagsul-ob ka og polis or military uniform, basta wa lang nimo gamita sa pagpaila nga polis ka ug mangilkil ka, dili magamit ang Article 177 ug Article 179 sa Revised Penal Code.

Aw, lahi na hinuon kon makit-an ka nga sa akto gyud nagsul-ob ka og police or military uniform, kay "actual" man nimo nga gihimo ang pagsul-ob og uniporme. Pero kon picture ra gani, mosagop ko sa baruganan ni fiskal nga lisud molusot ang kaso.

Pero, of course, dili gyud unta na maayo apan wa may balaod nga magamit niana.

Nahinumdom mo nga si Cebu Governor Pamela Baricuatro nga gikiha man sab ni Byron Garcia kay pinaagi sa AI picture, naka-uniporme siya og SWAT? Na-Dismiss ra ang kaso

* * *

Ang department head sa Cebu City Transportation Office (CCTO) nakabantay og laing matang sa pagpangilad sa mga scammers, ug mao nga nagpahimangno siya aron dili kamo mabiktima.

Matud ni Raquel Arce nga dunay gipakatap karon nga posts sa social media nga ang tag-iya sa usa ka sakyanan nadakpan kuno sa gitawag og No Contact Apprehension tungod sa paglapas sa traffic laws.

Nagpasabot nga wa kuno ka pahibaw-a sa traffic enforcer nga nakasakop nimo nga nakahimo ka og traffic violations, ug makita ang plate numbers, ug ubang detalyi sa sakyanan.

Gibutang sa apprehension report nga gihimo sa scammers nga ang usa ka motorista, dunay multahanan base sa kalapasan nga iyang nahimo. Awhagon nila ang tag-iya sa sakyanan nga mo-click sa link.

Matud ni Arce nga ayaw gyud ninyo i-click ang clickable link kay madiskuhido gyud mo. Daghan na kaayong mga tawo karon nga way naantigohan sa maayong pagpanguwarta. Ug mihimo na lang og binuang.

* * *

Sagunson ang mga panghitabo nga dunay mga bato nga mangatagak sa karsada sa lungsod sa Sogod, diha sa gitawag og EME Road, ug matud pa sa akong nabasahan nagumikan kini sa proyekto nga butangan og desinyo didto sa ibabaw aron dili na modahili ang yuta.

Apan dunay nagpalupad og drone aron makita kon unsa gyud ang gihimo didto sa ibabaw. Kadudahan man nga dili ang pagpugong sa mga anapog ug lapok ang katuyoan, kondili, mora’g gipatag ang ibabaw nga gitagana aron himoan og estraktura.