Senado tinabla catering ng Sara team

MANILA, Philippines — Tinanggihan ng Senado ang kahilingan ni Vice President Sara Duterte na sagutin ang gastos sa catering para sa kanyang defense team sa gitna ng impeachment trial.

Ayon kay Senate President Win Gatchalian, wala umanong pondo ang Senado para sa naturang kahili­ngan, lalo’t kailangan nilang magrenta ng espasyo sa Philippine International Convention Center (PICC) dahil okupado ang mga committee offices ng impeachment proceedings.

“Obviously nagamit ‘yung aming committee offices sa impeachment. So with that we need additional funds to rent offices so in short, wala ­kaming pondo para magbigay ng pagkain sa prosecution and defense,” pahayag ni Gatchalian.

Nauna rito, kinumpirma ni Sen. Erwin Tulfo na tinanggihan ng ma­yorya ng Senado ang kahilingan. Aniya, “Paano namin sasagutin sa COA ‘yun? Saan natin kukunin ‘yung bayad sa pagkain? Tapos sila pa mamimili sa catering.”

Sinabi naman ni Sen. Ping Lacson na bilang chairman ng Senate committee on accounts, tinutulan din niya ang kahilingan. Giit niya, may sariling caterer ang Senado na dumaan sa bidding process, kaya’t hindi maaaring ipilit ang accredited caterer ng OVP.

Sa sulat na may petsang Hulyo 7, iginiit ni Duterte na ang pagkain at inumin ay dapat “sourced, prepared, and served exclusively by the OVP’s accredited caterer” bilang bahagi ng seguridad at kalidad ng serbisyo.

Ngunit ayon kay Lacson, ang pag-ako ng Senado sa gastos at paggamit ng caterer ng OVP ay maaaring lumabag sa procurement law.