DILG sa LGUs: Ipatupad ang revised child protection protocol vs child abuse

MANILA, Philippines — Inatasan ng Department of the Interior and Local Government (DILG) ang lahat ng local government units (LGUs) na ipatupad ang revised Protocol for the Case Management of Child Victims of Abuse, Neglect, Exploitation, and Discrimination (CANE+D) upang mapalakas ang child protection system at matiyak ang mas mabilis, maayos, at child-sensitive na pagtugon sa mga kaso ng pang-aabuso sa mga bata.

Sa ilalim ng DILG Memorandum Circular No. 2026-036, inaatasan ang mga LGU na ipatupad ang mga na-update na polisiya sa child protection, tiyakin ang sapat na serbisyo at mga interbensyon para sa mga biktima ng CANE+D, at magtatag ng mas maayos na referral at case management system sa kani-kanilang nasasakupan.

Ayon sa DILG, ang revised protocol ay nagsisilbing komprehensibong gabay sa paghawak ng mga kaso ng pang-aabuso sa bata at pinatitibay ang koordinasyon ng mga social worker, pulisya, health workers, mga guro, piskal, at iba pang frontline service providers. In-update rin nito ang 2013 guidelines upang umayon sa mga bagong batas, mga umuusbong na isyu sa child protection, at international standards.

Hinikayat din ng DILG ang mga LGU na makipagtulungan sa mga civil society organizations (CSOs), non-government organizations (NGOs), faith-based groups, at iba pang stakeholder upang mapalawak ang mga community-based child protection program at higit na maprotektahan ang mga batang Pilipino laban sa karahasan, pang-aabuso, pagsasamantala, kapabayaan, at diskriminasyon.