Cebu Landmasters 2003, ARQ 2001 mag-engkwentro sa Division A finals

CEBU, Philippines — Ang way pilding Cebu Landmasters Batch 2003 ug ang ARQ Batch 2001 mipatikangkang sa hingpit sa tagsa-tagsa nila ka mga karibal aron pag-abante sa Division A finals sa Sacred Heart Ateneo Alumni Basketball Athletic Association (SHAABAA) Season 29 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, siyudad sa Mandaue.

Si Raymond Dennis Tan mibulsa og 16 puntos uban ang pito ka rebounds, tulo ka assists ug usa ka  steal samtang si Daryle Tan mikadlit og double-double nga 15 puntos ug 14 ka rebounds nga iyang gisukipan og usa ka assist ug tulo ka steals sa dihang gituldokan sa Batch 2003 ang season sa Big Three Pizza Batch 1996 uban ang 66-52 nga kadaogan sa Game 2.

Miamot si Justin Huang og 11 puntos, walo ka rebounds, upat ka assists ug duha ka steals alang sa

Batch 2003, nga mosakbang batok sa Batch 2001 sa best-of-three finals series sugod karong Domingo, Hulyo 12.

Ang Batch 2001 mipalig-on sa ilang kampanya nga makuha og balik ang korona nga ilang nadaog niadtong 2024 human gitagak ang Core Pacific, 73-59.

Si Carlo Villarica maoy nangu sa Batch 2001 bitbit ang 18 puntos, walo ka rebounds ug usa ka steal. Si Mark Hing midonar og 15 puntos, lima ka rebounds, usa ka assist, ug usa ka steal samtang si Wendell Ong adunay 14 puntos, upat ka rebounds, tulo ka assists ug usa ka steal.

Nagparamdam sab si Jason Arquisola sa iyang presensiya uban ang nuybe puntos, walo ka rebounds, upat ka assists, ug duha ka steals alang sa koponan nga gisuportaan sa ARQ.