Alapag bunyagan dayon og kayo sa PBA

CEBU, Philippines — Mabunyagan dayon og kayo si Jimmy Alapag isip head coach sa NLEX.

Kini gumikan kay ang Road Warriors makigharong batok sa guest team Macau Giant Pandas pagsugod sa PBA Season 50 Governors’ Cup karong adlawa didto sa  Ynares Center-Antipolo.

Ang ilang sangka gikatakda sa alas 7:30 sa gabii, human sa pasiunang engkwentro tali sa Terrafirma Dyip ug Titan Ultra Risers sa alas 5:15 sa hapon.

Si Alapag kanhi bitoon sa TNT ug Gilas legend. Sakop siya sa Sacramento Kings coaching staff sa NBA sa wala pa modawat ning bag-ong tahas sa iyang karera.

Saligan ni Alapag aron mangu sa NLEX ang import nilang si DeQuan Jones, nga mi-average og kapin sa 28 puntos matag duwa sa miaging niyang kampanya sa PBA.

Sa lokal niyang mga batos, si Alapag makasandig sa abilidad nilang Robert Bolick ug Kevin Alas.

Kagrupo sa NLEX ug Macau ang TNT, San Miguel Beer, Converge, Titan Ultra, ug Terrafirma. Samtang magkumbati sa laing grupo ang Ginebra, Blackwater, Magnolia, Meralco, Phoenix Super LPG, ug Rain or Shine. Ang Top 4 matag grupo moabante sa crossover quarterfinals ning panapos sa season nga komperesensiya.