Mga maniobra ni Sara
Si Bise Presidente Sara Duterte ang nagkawot sa dakong lungag nga iya karong nalubngan: Mahinayon ang iyang impeachment trial karong tuiga, kanus-a dili kapugngan ang pag-abli sa bank accounts ug ubang mga ebidensiya batok niya, nga mahimong mopahagsa sa iyang ambisyon nga mag-presidente sa 2028.
Liwat siya ni kanhi Presidente Rodrigo Duterte. Kansang pinatuyangan nga mga diskurso, panghulga ug pagbugal-bugal sa iyang politikanhong mga kaatbang, mga sibilyan, kababayen-an ug mga huwes sa International Criminal Court (ICC) nahimo nga labing lig-on nga mga ebidensiya sa giatubang nga kasong crimes against humanity.
* * *
Nia ang nagkataas nga lista sa mga maniobra ni VP Sara nga mao ra sab ang nakapa-apiki niya:
Pagdaog sa iyang petisyon sa Korte Suprema sa niaging tuig sa pagbasura sa orihinal nga articles of impeachment nakahatag sa House of Representatives og dugang kahigayonan sa paghipos og mas lig-on nga mga ebidensiya batok niya;
* * *
Iyang pagkumbinser sa Korte Suprema nga giyatakan ang iyang katungod sa due process nakapugos sa House pagpatawag og public hearings nga nakabanhaw sa interes sa mas daghang katawhan sa mga pasangil sa pagpangawat;
Iyang pag-apura nga unahon pag-imbestigar ang mas dakong kawat sa flood control scandal kay sa iyang impeachment niresulta sa pagpasaka sa mga kasong plunder nga makapa-priso sa duha ngadto sa tulo niya ka mga alyado nga dili na hinuon makadupa niya atol sa Senate impeachment trial;
* * *
Pag-awhag sa iyang mga alyado pag-ilog sa liderato sa Senado aron sabotaheon ang iyang impeachment trial nakapugos ni Bato dela Rosa paggawas aron molampos ang kudeta ug naka-aghat sa bag-ong majority bloc pagtago ug pagpa-ikyas niya, nga gidudahang naglakip sa pagpamusil batok sa peke nga pag-atake sa Senate building, nga karon nisugba nilang Alan Peter Cayetano ug kaubanan sa posibleng mga kasong kriminal; ug
Human gilubag ni Chiz Escudero ang “forthwith” aron kayak-an ang articles of impeachment, nagpataka si Robin Padilla pag-define sa “force majeure” aron makatabang ang ilang kaubanan sa impeachment trial online (nakalimot nga mas daling matultolan kon mag-Zoom si Bato ug ang Bureau of Jail Management and Penology ug Sandiganbayan, dili ang Senado, ang magbuot hatagan bang pinirisong mga senador og telepono ug internet access.
* * *
- Latest
