Ma-starstruck gihapon
CEBU, Philippines — Giangkon ni Carla Abellana nga ma-starstruck gihapon siya kang Bea Alonzo bisan man nga nagkasoud na sila sa aktres. Magkauban ang duha sa Kapuso series nga Widows' War. Subling gisaysay ni Carla nga wala gyud niya damha nga makatrabaho si Bea.
Laing hugna
Human nagmalampuson ang bag-ohay lang nga tulo ka gabii nga konsyerto sa BINI, gianunsyo sa maong all girl group nga duna sila'y laing konsyerto nga mahitabo karong Oktubre 4 sa Araneta Coliseum."Exciting ito, Blooms. Maraming-maraming salamat po sa inyong lahat," suma pa ni BINI Jhoanna.
Direk John
Si John Prats ang direktor sa Manila concert sa South Korean artist nga 10cm . Mahitabo sunod buwan ang maong konsyerto. Kabahin kini sa "Closer to You" Asian tour.
Pagkanta gisudlan na ni Alyssa
Hingpit na nga gisudlan sa actress-beauty queen nga si Alyssa Muhlach ang kalibotan sa pagkanta.
Gilusad niya dili pa lang dugay ang iyang debut single nga “Paalam” nga ubos sa Tarsier Records.
Ang maong R&B pop single kay naghisgot sa tawong gusto na nga nakalingkawas sa hinigugma nga naghatag og labad.
Gi-release napud ang music video niini niadtong Hunyo 28 ug gibitoonan kini nila ni Chie Filomeno ug Jake Cuenca nga nidala isip mag-uyab nga dunay toxic nga relasyon. Madungog ang “Paalam” sa nagkadaiyang streaming platforms.
Sa wala pa siya nisulod sa recording, nakalugwa na si Alyssa sa pipila ka mga pelikula nga sama sa “Clarita” ug “Hellcome Home”.
Nalakip pud siya kaniadto sa Kapamilya series nga “2 Good 2 Be True.”
Siya usab ang nakalangkat kaniadto sa titulo nga Ms. Reina Hispanoamericana 2018.
Kampo ni Bea mihimakak sa alegasyon
Gihulagway sa kampo ni Bea Alonzo nga "pure harassment" ang mga kaso nga gipasaka batok sa aktres nga gikan sa kanhi drayber niini.
Ang nireklamo batok sa aktres kay ginganlan og Efren Torres delos Reyes, Jr.
Gipasanginlan niya ang aktres nga matud pa wala kahatag niya og night shift differential pay, overtime pay, holiday pay, 13th-month pay, ug separation pay. Nakasinati matud pa siya og illegal dismissal, maltreatment.
Dali nga nitubag ang abogado ni Bea nga si Atty. Joey Garcia ug niklaro kini nga walay kamatouran ang alegasyon nga gibato ngadto sa iyang kliyente.
"For the record, Mr. Delos Reyes only served as service driver of the family and only for a short period of 3 months, he was not even assigned as Bea’s personal driver, for her professional engagements. Thus, his claims seem farfetched, unreasonable, if not unrealistic," matud pa sa abogado ni Bea.
Jak pasok sa Black Rider
Gawas sa Korean actor nga si Kim Jo Soo, lakip sa bag-ong mosulod sa teleseryeng Black Rider mao ang aktor nga si Jak Roberto
Gidala niya ang karakter nga Moises nga nagdako sa kadalanan nga naneguro usab sa pagdepensa sa iyang kaugalingon gikan sa mga hagit nga giatubang niini.
Ang karaang bitoon sa Black Rider nga si Yassi Pressman kay nihangop pud sa mga bag-ong nanulod sa Black Rider.
Nanuroy sa Taiwan Jane ug Rob dunay relasyon?
Naintriga ang pipila ka netizens sa istado nila ni Jane De Leon ug Rob Gomez human nasigpatan nga nag-uban ang duha sa usa ka restaurant didto sa Taipei, Taiwan.
Sa Instagram, gipakita ni Jane ang video kun diin nagkaon siya og ramen ug kalit lang nipatim-aw sa iyang kilid ang aktor nga si Rob .
Sa pagsulat niining balitaa, wala pa mohatag og komento ang duha ka kampo kalabot sa maong taho .
Dingdong padaganon og senador
Nakugang si Dingdong Dantes sa dihang naabot kaniya ang taho nga matud pa dunay pipila ka mga grupo ang nag-awhag kaniya nga modagan og senador sa umaabot nga piniliay.
Mapasalamaton ang aktor sa tanang nisalig sa iyang abilidad apan wala siya'y plano nga mosulod sa politika sa pagka-karon.
Matud pa ni Dingdong nga busy siya sa showbiz ug sa pag-atiman sa ubang butang. Gihatagan usab niya og atensyon ang gidumala niya nga organisasyon nga AKTOR. PH .
- Latest